كان محكوم بالإعدام وبقى 18 لعام وهو كيتسنى.. مجرم مات بالفرحة ملي سمحات ليه عائلة البنت اللي قتلها!

في إيران، راجل كان محكوم عليه بالإعدام بعدما ارتاكب جريمة قتل فـ2004، وبقا أكثر من 18 عام وهو كيحاول يتجنب تنفيذ الحكم بحبل المشنقة.

القصة المأساوية اللي كتضر فالخاطر، هي أن العائلة ديال البنت اللي قتل سمحات ليه، وهو من الفرحة اللي شداتو ملي سمع الخبر جاتو جلطة وبقا ساعة فالصبيطار قبل ما يموت.

الجريمة ارتاكبها السيد ملي كان عندو 37 عام، والعائلة قررات من بعد ما برد قلبهم على بنتهم باش يسامحوه ويخرج يعانق الحرية، لكن القدر ديالو كان مغاير.

وكاينين ناس فإيران، عبر مواقع فالأنترنت،  اللي كعاو على هاد “القرار العائلي” ديال التنازل و العفو على مجرم قتل بنتهم الصغيرة، وقالوا بللي من المفروض يتحمل مسؤولية أفعالو وكان خاص يتنفذ عليه الحكم القضائي وماشي يخرج بتنازل أو مسامحة.