بلان فشي شكل.. شركة كتعتامد على الغراب باش يجمع البينتات ديال الكَارو – فيديو

قالت جريدة “The Guardian” البريطانية فتقرير نشراتو بداية هاد الشهر بللي مدينة “Södertälje” فالسويد خدمات بواحد الفكرة جديدة باش تبقى تنقي الزناقي من البينتات ديال الكَارو.

الشركة المسؤولة على هاد الپروجي وجدات بزاف ديال الغربان باش تكون المهمة ديالهم هي يجمعو بقايا الكَارو بالمنقار ديالهم.

كريستيان كَونتر هانسن، مؤسس شركة “Corvid Cleaning”،  قال أنه من خلال الاعتماد على هاد النوع من الطيور غادي يمكن توفير واحد 75 فالمية من الفلوس اللي مخصصة لجميع البينتات ديال الكَارو فالزناقي والشوارع.

هاد الغربان غادي يتم تدريبها وفمقابل الخدمة ديالها غادي تستافد من الماكلة.

أي غراب جاب بينتة وحطها فماكينة خاصة غادي تخرج ليه الماكلة.

هاد البلان حرك نقاشات كثيرة ومنها انتقادات من طرف بعض المدافعين على حقوق الحيوانات، اللي كيقولو بللي هاد النوع ديال الزبل مسؤولين عليه المدخنين وهوما اللي خاصهم يجمعوه بلا مانبقاو نستاغلو حيوانات أخرى بريئة فجميع الديشي ديال بنادم.